رحلة وداع بلا ضجر

أسومة حبت وابتدت في رحلة مشوار الألم وقليبها الحديد في الحب خفق حبت هناك شاب فقير اسمو البشير حباها برضو كمان حبيبها وسوي ليها الكون حلم شاف في وشيشها سعادتو كامنة وقال ليها السعادة بلاك عدم . شافت حبيبها في فقرو ذي ملك في قصورو حافيهو الخدم . وحبهم كتموه في جوه الضلوع داروهو من الناس زمن . واتلاقو يوم تحت النخل قال ليها يانور الفؤاد يا البيكي نور الكون كمل .دايرك تكوني معاي دوام في بيتنا الفرح يكتمل . التومة قالت ليهو لي بتين العرس لي متين الحب ده يظهر ويبقي جد . رفعت راسها في غاية خجل كانت عيونها تقول كثير وكلامها كان فيهو الخجل .قالتلو حبك في القليب حاضناهو حبك زي طفل لسه صغير في الدنيا ماعرف الملل. انت ماعارف ابوي راجل صعب . عارفاهو يضبحني لو عرف الحاصل . قال ليها بس كيف العمل . قالتلو خليها الظروف تمشي وتمر ما بترحم قلوب يادوبها عرفت تبتسم . دنقر طويل لامن بكي وعاين ليها في لحظة ألم قال ليها احسن نفترق انا عارف دربك مادربي انا في هواك قلبي احترق . ختيتو حبك في القليب اصلو ابدا ما مرق . أسومة قشيها الدموع الجارية تحرق في القليب . ارادة الله نتلاقي ونفوت والليلة وقفنا في نص الدرب . أسومة لو في قسمة يوم حنتلاقي لو دفنونا وسط التراب . سالت دموع العاشقين سقت الرمال حرقت الحشا وزاد اللهب . قالتلو والدمعة سائلة بلا انقطاع أه يا البشير كيفن نروح ونسيب قلوبنا دي في اندفاع . بعدك محال اسعد محال. ياهو الألم ياهو العذاب ياهو الضياع . كيفن الزهور تحيا وتعيش محرومة من نور الشعاع وفي لحظة قاسية انفجرت دمعاتو ذي شلال تدفق في البقاع . وقال ليها يا أسومة الوداع واتعانقو . اتأوهو وسكبو المشاعر بالتياع . كانت هناك ست النفر من قريتهم شافت أسومة في لحظة عناق . وقليبها بالغيرة استعر وللقرية بس شالت الخبر . قالتلهم أسومة شفتها والبشير قاعدين سوا في الغابة في وسط الشجر وفي القرية ده الخبر انتشر . وكان الجو ينذر بالخطر . لم الولاد أبوها حاج الخضر . كان بالزعل منتفخ لامن عيونو بقن حمر . قال ليهم بالدم تغطوهو البشير . وكانت أسومة تسمع في الكلام بالليل خلاص والناس نيام . كانت هناك سكين بتلمع في الظلام دايرة العذاب والانتقام وكان البشير من بدري نام . والباب فتح في سرعة ذي لمح البصر . واقف هناك حاج الخضر . داير الغدر واللبلة ماياهو القدر . قدامو كان راقد البشير ماحاسي بي كل خطر .وأسومة بي تصميم غريب تجري بي سرعة ولهيب قاصداهو بس بيت الحبيب . تكون معاهو تقيف حداهو وتحميهو من شرا قريب . ورفع الخضر سكينو وفي اللحظة ديك أسومة وقعت في البشير وجات الطعنة في سرعة وأزير . جوه الصدير . وأسومة صرخت يابوي مستحيل تقتل البشير افديهو بنفسي بي عمري القصير . وأسومة وقعت في التراب ممزوجة بي دم القليب العمرو عايش في اغتراب . حاج الخضر بي قلق شديد شالو الدرب . روح بعيد والبشير بي كلو شقا وعناء شال أسومة بي ايديه ذي شيل الجنا . قلبو بيقطر عذاب وكان بحس بيهو العناء قال أسومة ماتت عشاني انا . ضحت بي حياتها عشان اعيش . لكن محال اسعد واضوق طعم الهناء . ووصل لي القبور وعلي القبور واقفة الشواهد في فتور .وأسومة ختاها البشير براحة ذي جثمان امير . وبراهو واقف منفرد . حضر قبرين لصق بعض وخت أسومة في ود اللحد وبالتراب واري الجسد . والبشير بي سرعة قام والليل لفاهو الظلام . قال الليلة آخر لي كلام بعد أسومة حياتي صارت لي حرام . ايه معني الحياة اذا اصلو فيها الدموع ما الابتسام .الوداع يادنيا واديكي السلام وغرز سكينو في نص الصدر . والدم تدفق ذي نهر منهمر . واترنح وانكفي براحة في نص القبر
الصل دا كان صورة حية من واقعنا كانت مسرحية وأسومة والبشير ديل كانو الضحية . القصة لسع ما انتهت كم فينا ذي أسومة مظلومة وبكت كم شهيدة وكم عزيزة اتغربت بسبب القلوب الفيها العداوة وما صفت لسه بيناتنا وكم من غيرة ووشاية جارة وراه كم أسومة.
والبشير رغم اثمو وآهاتو ودمعاتو الجرت .
نحن ليه ما تصفي ذاتنا وكل حياتنا من مطامعنا ونفاقنا .
نحن ليه ما نبقي مشعل ونهدي للناس ابتسامنا
نحن ليه مانخلي بس للحب مكانو نملأ دربو بالأزاهر نديهو حديثو ونعانقو بي سعادة ذي بشائر ونبقي ماناس المظاهر . جوه حاكمانا الضمائر
ولو حصل القلتو كلو كان أسومة بتعرس البشير
وتعيش الناس في حب وخير وبشائر